Wodzisław kulturalnie

Nie wiym czy moga sie mianować lokalnym patriotom, ale nie zgodza się z takom opiniom, że we Wodzisławiu sie psinco dzieje. Jo myśla blank inakszy. Ostatni czasy rozkwitomy kulturalnie. A przikładow je dużo, choby wczoraj.

Nie zgodniecie, kto też do nos przijechoł? Som miszcz, kierego mogymy dycki podziwiać we telewizorze- Bogusław Kaczyński. Mom se za coś, żech mog poznać tako osobistość. Znany dziynnikorz, krytyk muzyczny, zresztom kożdy rok w Nowy Rok mogymy go posłuchać jak zapowiado opera wiedyńsko.

A Pan Bogusław jak dycki-  wysztiglowany i bez żodnego feleru. Ale to je nic podle jego godki. Takich ludzi aż uciecha słuchać. Mistrz słowa, savoir-vivru, zachowanio sie.

Mioł do czyniynio z nojwiynkszymi sławami świata. Kiery przeca nie słyszoł o Pavarottim, Domingo czy Carrerasie. On nie yno o nich słyszoł, ale ś nimi godoł.

Bez to, jo tyż se mioł w zocy, żech mog zaprosić i poczynstować Pana Bogusława u mie we restauracji, prawdziwie po ślońsku. Nie brakło hekeli na forszpajza, biołego żuru, rolady z kluskami i modrom kapustom. A na deser przipadła pyszno śląsko kopa.

Pan Bogusław nie umioł se nachwolić naszego jodła, zresztom wcale sie tymu nie dziwia. Ale do mie ważniejsze było to, żech mog osobiście poznać miszcza.

A nojbardzi cieszy mie to, że Pan Bogusław bydzie spominoł dobrze Wodzisław skiż ludzi, kierych tu spotkoł, no i jodla kiere tu skosztował. Pyrsk!

---

• Psinco – nic
• Mieć se za coś – zaszczyt
• Wysztiglowany – elegancki
• Hekele – sałatka śledziowa
• Forszpajza – przystawka