Zdaniem Ślązoczki

Zaś sie tak roztomańcie namiyszało, że sie zdo, że tego nie przetrwomy. Trocha gańby w świecie już nom ta ekologiczno swada narobiyła. Ledwo my chcieli trocha zapomnieć zaś wyskoczył nowy „ekologiczny tymat”, o małym biołym niedźwiadku, (ale to nie u nas!). Tak by sie chciało rzec o przewrotności jejich rozumowań. Bo tak: wedle nich, ledwie żywy pies, połomany, bez oka nie śmi być uśpiony. Bioły, mały misiek, kierego, matka odciepła musi być uśpiony, bo se nie do w życiu rady... Dyć niech se tyn mały Knut żyje ku uciesze dzieci a jak przidzie na niego czas to przidzie i rada.

W polityce jeszcze gorszy, na świat wylazujom stare pieczki. Ledwo się skończyło z taśmami prawdy, to zaś inkszy za dużo powiedzioł a tamtyn to nagroł, i już zaś momy wielko haja. Przisłowi, godo, że niedobry to ptok, co własne gniozdo kala. Sprawa, z dochtorami pogorszyła to, co już i tak było złe! Dochtory nie operujom, dawcy sie wycofujom, a chorzi umiyrajom. Teraz jeszcze nas dopadły pneumokoki, sepsa i gruźlica. Czy to nie som te biblijne egipski plagi?

Te wszystki smutki, kiere nas spotykajom, odganiajom nasi wspaniali sportowcy. Uciecha jako przinosi nom Pan Adam jest nie do opisanio. Cały świat podziwio niesamowite wyczyny naszego skoczka. Dyć to jest tak jak we swoji ksionżce napisoł Morcinek, że do serc Polokow kapła kropla miodu. Zaglondali my, jak tyn mały wzrostym, ale wielki, sercym leci nad świyrkami. On pokozoł, co Polocy som we wercie. Cało Polska była wtedy razym z nim - wtedy, jak sie mu przitrefiył tyn feralny lot, kiery mog być jego „salto mortale” i wtedy jak zagrali w Planicy: „Jeszcze Polska nie zginęła”. Kiedyś śpiywali: „chłopaki nie płaczą„ a dyć Adamowi pasowało jak mu sie oczy mokre zrobiyły - my mu z uciechy pomogali i chocioż na ekranie chcieli pogłoskać, bo mo chłop szczyńści, kierego mu życzom wszyscy od małych dzieci do starzikow. U nas we Wodzisławiu też sie radowali. Tak sie zawsze godo, że jak Odra z Wisłom gro to bydzie powodź. Bo to przeca dwa najwiynksze polski rzyki, ale jak sie okozało, przi Boguminskij Wisła ni miała nic do godanio i musiała „odpłynyć” do królewskigo miasta. Ale jak to godajom: „roz na wozie, roz pod wozym”.

Aniela Langer