Borowkowy czas

Pozimki pomału sie kończom, za to w lasach pokozały sie już borowki (choć tak po prowdzie to som jagody, yno u nas sie tak godo). Wtedy tyż wiym, że zaczło sie lato. Bo do mie letni kust to parowki z borowkami, zisty, kołoczki z borowkami i maślanom posypkom.

Do tego najlepszy na świecie kompot z borowek.

Ale musza wom pedzieć, że borowki to same zdrowi. I jak nasze omy zbierały w lasach i nom warzyły, to wiedziały co robiły. Przede wszyskim w borowkach je luteina, czyli składnik, kiery poprawio nasz wzrok. Beztoż bajtel, stary, młody, mo borowki jeść jak chce sie cieszyć dobrym wzrokiym.

Ku tymu dobrze je jeszcze pić tyj z zielin borowek. Na przeziymbiynia jak znod.

Jo dycki godom, że trza korzystać z darow natury, a borowki to istny dar matki natury. Jeszcze nie udało sie wyhodować borowki, kiero nadowała by sie do zegrodki, jak ta z lasa.

Je oczywiście borowka amerykańsko- ale łona ani se ni może stanyć kole tyj naszej, polskij, kiero rośnie na dziko.

Roztomili Ludkowie, wykorzystejcie tyn czas borowkowy na zimowe zapasy. Zrobcie se kompoty do krałzy, dżymy, no i jydzcie na zdrowi borowki, bo siyła je w naturze. A borowki to sama natura i nasze zdrowi. Pyrsk!

 

Pozimki–  truskawki

Borowka – jagoda

Parowka – kluski na parze

Zista – babka

Tyj – herbata

Krauza – słoik