Jako z tym naszym patriotyzmym?

Jak kożdy rok 11-tego listopada momy fraj, bo trefio nojwiynksze świynto państwowe- rocznica odzyskanio niepodległości. Latoś pizła już 95, beztoż je sie czym pochwolić.

Ale tak se ształnuja, jakoż też je z tym naszym patriotyzmym? Nie powiym, som tacy co rychtyk świyntujom, wiyszajom fany i życio kaj indzi niż we Polsce se nie wyobrażajom.

Ale dużo je takich co 11 listopada kojarzom yno z tym, że nie cza iś do roboty. Ale czamu je wolne tego już nie poradzom wiedzieć.

Spytajcie sie o 11-tego listopada jakigo młodzioka. On nie wiy, ani kiedy Polsko dostała nazot wolność, ani dziynki komu to momy.  Po co mu to wiedzieć, a zresztom nie pisali o tym na Internecie.  Do wiynkszości młodego pokolynio, urodzonego już po komunie, je to najzwyczajni dłogi łikynd i dobry czas na imprezowani.

Zresztom nasz patriotyzm piyknie wyszoł, jak szydło z miecha, jak yno wleźli my do Unie Europejskij i mogli my jechać kaj indzi do roboty. Yno dwa miliony ludzi pojechało weg za robotom i groszym. I kiery mo robić na te nasze Państwo i nasze pyndzyje?

Ale czy tzw. kasa, o kierej sie durch tera myśli, je nojważniejszo?

Zawsze w Polsce je sie u siebie, a tam je sie yno auslyndrym. No i na co nasze stażiki, walczyli bez wojny i nie yno? O wolne państwo z kierego tela ludzi uciykło?

Tak miyndzy Bogiem, a prowdom, to ciynżko z tym naszym patriotyzmym. Bo patriotyzm to nie yno fana, wolne, ale przede wszyskim to jak myślymy i czy chcymy tworzyć Polska. Pyrsk!

---

Latoś pizła – w tym roku wypadła

Fana – flaga

Nazot – z powrotem

Miech – worek

Auslynder – obcokrajowiec