Ciynżko pedzieć

Wiycie, nie rod politykuja, ale jak trza się łodezwać, to trza.

Łoto we niedziela dziwoł ech sie na debata prezydyncko i powiym wom, że durch ształnuja na kogo puda. Ciynżko wybrać, ale kogoś trza. Bo ludziska nojprzod na wybory nie idom, a potym halatajom, jako jim to je źle. A tak, chocioż wiym, zech som wybiyroł i ta cegiełka ech dociepnoł do tego co momy.

Ni ma lekko, ale wto padoł, że w życiu je kolorowo. Ale wroca się do tej debaty.

Ni ma zy mie żodyn psycholog, ale wiym jedno, że jak wtoś yno sie uśmiycho, to podle mie za skorom nic dobrego ni mo. A do tego tyn Duda, jakoś mi nie pasuje (taki wyuczony, elegancki i za fest poprawny)- a jo tego nie kupuja, bo my na Ślońsku som blank inksi. Patrzymy roboty, a nie fanzolynio z kierego i tak nic ni ma.

No a co z tym naszym Bronkiym?

Pora razy gafa szczeloł i to nie mało- jak Angela Merkel stoła, a Bronek już siedzioł we fotelu, o Japonii nie spomna. Ale z drugij strony zachowuje sie i godo blank naturalnie.

Jo som niekiedy blefna coś, a potym dziypiyro myśla. Tak to już nikiedy je.

Wiycie tak se myśla, że prezydynt mo być dlo ludzi i nie grać. Bo przebiyrańcow momy we polityce pierońsko dużo. Nie wiym wto bydzie lepszy? Ale wiym jedno, że puda na te wybory i sprawdza, coż też rychtyk nom z tych łobiecanek zrobiom. A czas pokoże. Pyrsk

blefna - powiem

rychtyk - naprawdę

halatać - narzekać