Mikołoj a nie elf
Felieton Remigiusza Rączki
Roztomili Ludkowie pisołech już łoński rok o Mikołoju, z kierego terozki robi sie jakiś elfa przebleczonego we czerwone lonty.
A do tego ni mo to nic do kupy z Mikołajym na kierym żech sie wychowoł.
Przeca kiejś Mikołaj boł yno we Mikołaja- 6- tego grudnia i to jeszcze w blank inszej postaci.
Bo przebleczony we szaty biskupi, z porządnom krykom, a nie jakiś czerwony skrzat we czopce z pomponikami.
Jo ształnuja, czamu my se dowomy robić woda z mózgu?
Mikołaj je cołki grudziyń, a jakby tak szło, to przijechoł by już we listopadzie, zarozki po Wszystkich Świyntych. Jakoś porażka. Kaj we hipermarkecie nie wejrzycie Mikołoj.
A kaj nasze tradycje i dzieciątko, kiere przinosi geszynki na świynta?
Nom starym to ni ma nic dziwnego, ale wytłumacz to bajtlowi, kiery mo 3 latka i we wszystkich heftach kiere sie mu czyto je czerwony, chruby Mikołoj kiery godo HO, HO, HO.
Je to ciynżki do przetłumaczynio. Przeca jako je we telewizorze i hefcie, tak to niby rychtyk je.
A nie wiym czy poradzicie wiedzieć, że tyn czerwony Mikołoj je wytworym marketingowcow z coca cole, kierzi postanowiyli zwojować tym świat. Chyba sie jim udało.
Beztoż kochani Ludkowie wszysko terozki zależy łod nos. Pyrsk
Kryka - laska
Hefty - zeszyty
Dzieciątko - Jezusek