Dejcie se pozor na Klima
Felieton Remigiusza Rączki
Powiym wom, że czasy momy taki, że kaj yno człowiek je, tam wszyndzi dmucho klimaanlage. We aucie, bankach, no i restauracjach.
Nie powiym, to je dobro rzecz, bo jak prziwali hycym, toż człowiek jakoś może dychać. Ale dycki je jakiś ale. Bo czy łona je zdrowo? No musza pedzieć, że niy.
Słyszoł ech tyż, że Klima we aucie jak ni ma przepucowano, toż mogom sie tam jakiś bakteryje mnożyć, a z tego idzie i astma chycić. Taki pieroństwo.
A jo bołech łoto na fajerze, no i wiadomo, człowiek poskokoł przi orkiestrze, coś tam chlapnoł, a potym jeszcze wylazowoł na dwor. A ku tymu miejsce kaj żech siedzioł, było pod nawiywym z Klimy. Zestaw idealny na choróbsko. I też tak sie stało. Już nad ranym zaczło mie boleć w karku, we połednie miołech gorączka, a popołedniu leżoł żech już jak wypluty kanold. Najzwyczajnij we świecie mie przewioło. Pocioł ech sie jak przemarznyto koza. Terozki sie kuruja kompotami z malin, porzyczek i borowek, ale chyba bez doktora sie nie obydzie. A leżeć ni ma kiedy.
Roztomili Ludkowie, dejcie se pozor na Klima, żeby wos tyż nie siekło jak mie. Bo nikiedy człowiekowi sie zdo, że fajnie dmucho, a potym widzicie, ańc mig i człowiek chory.
Idzie nieciekawy, jesiynny czas, kaj bydzie kidać z nieba, wioć, bezto życza wom dużo zdrowio, no i siebie tyż. Pyrsk
Hyc - upał
Przepucowano - przeczyszczona
Pozor - uwaga
Ańc mig - bardzo szybko