Witejcie Roztomili Ludkowie!

W lipcu momy dycki rocznica prziłonczynio czynści naszego Ślońska do Polski. Stało sie to we 1922 roku po Plebiscycie, z kierym tak po prowdzie było roztomańcie. Bezmałaś tam kaj yno były lepsze pola, fabryki, Niymcy robiyli wszysko, żeby yno nie dać tego weg. Bezto Raciborz, Gliwice, Zobrze, Bytom, to wszysko zostało w Nimcach.

Jo jeżech ogromnie rod, że tu kaj cołko moja familijo żyła przed II wojnom, była już Polska– choć tak po prowdzie Autonomio Ślońsko. Dużo sie tera godo i trombi ło tej Autonomii. A jo nigdy niy słyszoł od starki abo starzika o Autonomii, yno dycki godali, że za starej Polski. Tu kaj miyszkomy i żyjymy rychtyk była Autonomio Ślońsko, ale czy je nom to teraz po telkich latach poczebne? Czy żeby czuć się Ślońzokiym musza mieszkać w Autonomii?

Jo wom powiym yno tela, je żech Hanysym z krwi i kości od 7 pokolyń (tela mom udokumentowane), przede wszyskim flyjguja nasze tradycje i rod żech je, że moga jak to sie tera piyknie godo promować slońskość. Ale czy skuli tego mie je poczebno Autonomio?

Jo niy godom, mono byłoby to i dobre, ale co z takimi miastami jak Sosnowiec, abo Bielsko, były by już zagranicom?

Dejcie pokoj! Potym by jeszcze cza było posegregować ludzi – na echt hanysow, basztardow i echt goroli. A jakby Gorol broł se Hanyska, toż musieli by iś po pozwolyni na krojcowani ras.

Dejcie pokoj!

Byci Ślońzokiym, to przede wszyskim to co mo sie w sercu i to jak sie żyje. Czy je sie robotnym i uczciwym, a nie to kaj sie miyszko.

Moja Familijo walczyła w powstaniach o prziłonczyni do Polski i niech tak zostanie. Pyrsk!

---

Trombi – nagłaśnia

Mono – może

Basztard – dziecko hanysa i goroli (lub na odwrót)

Krojcowani – krzyżowanie

Nie dać weg – nie oddać