Ostatkowy fajer

Witejcie piyknie Ludkowie. Latoś łogromnie wartko kończom nom się zapusty czyli po nowomodnymu karnawał, a wszysko skiż tego, że i świynta bydom jeszcze chyba we marcu.

A jak koniec karnawału toż i ostatki, kiere po ślońsku nazywomy śledziym. Jo dycki ształnowoł czymu wszyscy godajom na to ślydź. I tak se myśla, że skuli tego, że cza wtedy zjeś harynka. Te harynki majom wróżyć dostatek i bogactwo. A pamiyntejcie, że harynki na Ślońsku dycki były fest ważne, bo piyrwej w kożdym sklepie stoła beczka z nimi, a i momy w kuchni ślońskij pora receptow z nimi (choćby śloński szałot, hekele, czy bratharynki).

Bezmałaś w ostatki cza się wyszumieć i masno pojeś, żeby już w poście postować i o gupotach nie myśleć. A my na Ślońsku radzi fajrujymy, bo przeca Hanysy to wesołe ludzie. Radzi my se dobrze pomaszkecić, cosik chlapnyć, ale i potańcować.

Powiym wom yno tela, że wszyscy nom zowiszczom naszej gościnności, kuchnie i nie yno. Bo kaj tak dobrze warzom jak nie tu, na Ślońsku. Takich fajerow jak my tu momy ni ma nigdzi.

Dobro muzyka, piwko, konkretno zagrycha, to je to co Hanysom dycki pasuje.

Pamiyntejcie, żeby fajrować jak yno idzie, bo przeca życi leci, a człowiek nie wiy dłogo po tym bożym świecie bydzie deptoł. Ku tymu, czasy momy tak zagonione, że szkoda słow, bez  to bowcie się. Ale pamiyntejcie, że w prziszło szczroda już bydzie popielec, bez to cza se dać gowa posuć i zacznyć pościć. Pod wiela yno jeszcze momy zapusty fajrujcie wiela wlezie.

Życza wom uciechy i pełnych brzuchow na ta końcowka krotkigo karnawału. Pyrsk!

---

Słowniczek:
zapusty- karnawał
fajer- zabawa
recept- przepis
harynek- śledź
zowiścić- zazdrościć
deptać- chodzić