„Noworoczne postanowiyni”

Witom Wos piyknie! Dycki w nowym roku chcymy, keby tyn roczek boł lepszy od tego kiery sie skończoł i wszysko było blank lepsze.

Nie wiym jak wy, ale jo kożdy rok obiecuja se noworoczne postanowiyni, chocioż roztomańcie z tym mi idzie. Nikierzi obiecujom se, że sztopnom z kurzyniym, inksi z gorzołkom. Baby dycki chcom schudnyć na szlangierki, a chopy ćwiczyć muskle. Beztoż na poczontku roku na basynie, czy siłowni palca nie wrazicie, co je tela ludzi. A potym z każdym miesioncym, to je równia pochyło- coroz myni ludzi wyczimuje w tych swoich postanowiyniach.

Jo mom dycki problym z nie jedzyniym bombonow i maszketow, bo od stycznia zaczyno sie w moji familiji sezon geburstakowy. A przeca iś na gościna i dziwać sie na inszych jak szrotujom roztomańte jodło, a ty nic- to je istno utropa. Beztoż kole dwadziestego stycznia moji postanowiynia som lekko nadszarpnyte.

Ale tak se myśla, czy to wszysko je taki ważne- czy kiery schudnie, wyrzeźbi muskle, abo przestanie jeś bombony? Myśla jednak, że wcale niy. Wiycie jak na świecie było by dobrze, jak by tak kożdy postanowioł w nowym roku być lepszym człowiekiem- nie zowiścić inkszym, nie przeklinać, obgodywać. Tak po prowdzie w życiu nojważniejsze je to, żeby se pszoć, nie przezywać sie i szanować. A to czy kiery je chruby, czy zapadnyty w klacie, wedle mie je małoważne. Jak to wszysko pojmnymy to myśla rok 2013 bydzie rychtyk udany, a ta czinostka rychtyk szczynśliwo. Pyrsk!

---

Słowniczek:

Blank- całkowicie

Szlangierka- szczupła kobieta

Wrazić- włożyć

Geburstag- urodziny

Zowiścić- zazdrościć

Gościna- impreza okolicznościowa