Płaczymy razym z Borucem

Dzisiej pisza ło tym, co się to łostatnimi czasy skirz szportowców na świecie porobiyło. Chłopy i karlusy nerwowe. Telewizory jeszcze chyba tela przezywanie nie słyszały. Gazety - no cóż, kiero co chciała, to napisała, ale nerwowe i żałosne były i te zapisane linijki. Nejbardzij zimno krew i spokojne nerwy mioł (w telewizorze) tyn Szef, co se go łod Listków idzie zmianować.

 

Tak to już łod downa jest we szporcie, że nejwiyncyj złośliwości i dorady dostanie sie trynerom (choć tym razym - Ja! - nas rychtyk łod poczontku prziwiód do trzynsowki). Tak mi sie spomnieli downi trynerzy naszych piłkarzy, pan Piechniczek i to co se kibice ło Nim śpiywali „Entliczek, pentliczek co zrobi Piechniczek, tego nie wie nikt…” - szykowoł sie wtedy bardzo ważny mecz - a zrobiył co mógł. Synki Go słuchały i było ... co było.

 

Tak samo było z nieodżałowanym trynerym „Orłów” panym GÓRSKIM. Tryner Górski mioł „Orły”, a teraz rozżolyni kibice przirownujom szportowców kierzi przegrali... do szpoków, kierych mo sie pisać z małej litery.

 

Świyntej pamiynci tryner Górski godoł: „Piłka jest okrągła a bramki są dwie”. Jak był już leciwym i chorym mioł życzyni, żeby dożyć Mistrzostw, ale Pon Bóg wiedział, że jakby oglondoł ta sromota jako naszykowali nasi szportowcy, zamynczył by sie i przed tym zabroł Go na swoji spokojne niebieski boiska.

 

Możno mie nikierzi wyśmiejom, kaj tam staro baba ło szporcie pisze, ale jako to nie pisać jak ku tej naszej łod wiyrchu do dołu zblamowanej Polsce doszło jeszcze jedne upokorzyni!

 

Jak były w polskim szporcie zwyciynstwa, co nom ich świat zowiściył, to razym ze szportowcami kierzi zwyciynżyli my ze szczynścio też płakali. Teraz razym ze zrozpaczonym Arturem Borucem płaczymy! Jak gazeta pisze, to łon zchodziył z boiska z płaczym - przibity klynskom. Czy jyno łonymu zależało? A śpiywo sie „mężczyźni nie płaczą”, to co sie śnim dzioło?

 

Downiejsi szportowcy kierych my podziwiali też z ubolywaniym sie wypowiadajom. Nikierych jyno po twarzach poznowomy, bo ich downiejszo szportowo sylwetka trocha sie zaokronglyła, ale my i tak im pszajymy. O downych sławnych szportowcach jeszcze sie pamiynto.

 

Na Gali Ślonzoków Roku w Zabrzu dostoł tytuł Honorowego Ślązoka Roku Pan Gerard Cieślik, kierego na scynie wycałował Jego długoletni kibic prof. Jan Miodek, a goście na sali na stojonco Go oklaskiwali i przipominali kibicowani: „Cieślik gola!”. Aż sie ze wzruszynio borok popłakoł.

 

Po „bolawym” projekcie Ministra Kultury coby zabrać uczniom godzina WF-u łodezwali sie mondrzi i sławni ludzie szportu na łamach roztomańtych gazet. Jedyn proponowoł Ministrowi przijrzeć sie boiskom szkolnym, inkszy łopisoł godzina WF-u na kiero do sale gimnastycznej zerzynie sie trzi klasy a przisłowi godo: „Czego się Jaś nie nauczy tego Jan nie będzie umiał”. Na koniec usłyszano łod starzika bojka. Toż tak, starzik godali że fusbal wymyślył dioboł. Jak go robiył, ku tym wszystkim łatkom prziszył konsek babski skóry i to skirz tego konska babski skóry chłopy jak dymby we słońcu za niom locom.

 

Trocha mi to nie pasuje, bo teraz i baby za balym locom, chyba że jest tam konsek chłopski skóry to by mi to pasowało.

 

Pozdrowiom Szportowców i Kibiców. Jednym i drugim życza coby jedynom krwiom na boisku była krew z nosa po sklupnyciu sie, abo z łodrzytego kolana.

 

Ślonzoczka Aniela