Dzieci som ich całym szczyńściym

Piwowońki fajnie wypuszczajom, piykne żołte leluje( to je po fachowymu narcyzy abo żonkile) też. Piertuszka dłogo schodzi. Starka godali że nasiyni pietruszki musi zońść do Rzymu zanim poschodzi (to tak kole 4-5 tydni). Krzoki z wiepszkami już się zielyniom a na pole wyjyżdzjom gospodorze-jedni siejom, drudzy sadzom zimioki, trocha mi żol że już nie gospodarza - ale starość nie radość.

 

Dyć teraz idzie se wszystko gotowe kupić, a że tomaty coch na świynta kupiyła szmakujom inakszy jak te nasze downiejsze z krzokow-to już inkszo rzecz, a kapusta kiszono!gdo nie zno szmaku kapusty z beczki- tej swojski powiy,że dobro, ale jak my już som w Unii to muszymy jeść to, co jest wedle przepisu-odmierzone cyntymetrym. Za chrube zimioki to już som „ poza wyborym" (my się downij radowali jak chrube urosły). Nastały taki dobre czasy, że z postympym trza iść!

 

 

Taki tyn miesionc maj jest „naladowany" roztomańtymi wspomniyniami. Tak nejpiyrsze musiałabych spomnieć nieodżałowanego Ojca Św. Jana Pawła II. Urodziył się też w maju (i zaś się spełnio to coch przodź napisała, że ludzie urodzyni w moju som szczyńśliwi a jak się jeszcze dobrociom co majom dzielom z drugimi, to już jest konsek nieba na Ziymi). Czorno chmura zasłoniyła wtedy mojowe niebo, kiedy namówiony do złego Ali Agcza chcioł Ojca Św. zabić.

 

Czekomy na przijazd do Polski papieża Benedykta XVI, bliskigo przijaciela polskigo Papieża, kiery chce odwiydzić kraj, z kerego wychodzi kolejny polski świynty. Som my radzi Jego odwiydzinom i myślymy, że młodzi, kierzy mianujom się „Pokolenie J.P II" też bydom wiedzieć jak Ojca Św. prziwitać i być z Nim.

 

To mi tak jeszcze w moju zostoł Dziyń Matki. Teraz trza byłoby by napisać cało ksiynga bo na to zasługujom, ale napisza tak jak śpiywoł kiedyś nasz sławny Mieczysław Fogg „ o matce pieśń to pieśń bez słów, to pieśń przez łzy" abo Anna German, kiero swoja teschnota wyśpiywała yno matce: „Mamo smutno tu i obco..."

 

Niech te moji pisani bydzie na podziynkowani wszystkim matkom i tym pracujoncym zawodowo i tym wychowujoncym zdrowe ale i nikiedy chore dzieci, kiere som ich całym szczyńściym.

 

Ślonzoczka Aniela.