Dach Beskidow

Wiycie latoś wszyjscy ształnujom kaj jechać na wywczasy? Bo przeca zagranica trocha strach, choć zależy kaj. Lecieć do Egiptu, czy krajow islamskich z bajtlami, to już moga nazwać odwagom.

Z drugij strony jedyn przipadek zamachu, czymu mo przeganiać cołki świat turystyczny.

Ale kochani jak se tak pomyślicie, to przeca nasza Polsko je tako piykno, że grzychym je nie skorzystać i nie łodwiydzić ciekawych miejsc.

Jo łoto tyż taki odkroł. A boło to we Wiśle, kiero przeca kożdy zno. Bo skocznia, bo Małysz, bo rzeka Wisła, ale tego miejsca chyba ni znocie.

Zarozki we Cyntrum, je piykny wyciąg kanapowy- Skolnity, kiery wywozi bez zima i we lato na przeszło 600 m. Z wiyrchu landszafty som przecudne. Widać panorama cołkich Beskidow, a do tego idzie się przynś piechty na Czantoria, abo do Istebnej. Świyży górski luft, pyszny góralski kust i czego chcieć wiyncyj? Myśla, że to styknie, żeby wos przekonać do rajzowanio po Polsce.

Jak to się godo- cudze chwolicie, a swojigo niy znocie. Beztoż zamiast udować „kasa” w Euro, zostowcie jom lepszy u nos, a i dycki coś do zdrowio erbniecie.

---

Erbnyć – dostać, odziedziczyć

Landszafty – widoki

Kust – kuchnia, jedzenie