W Niewiadomiu po śląsku

Konkurs „W Niewiadomiu po śląsku – Bery, bojki, godki” był podzielony na trzi kategorie wiekowe i nojprzod przistompiyli do konkursu uczniowie szkoł podstawowych od IV do VI klasy z rostolicznych miejsc w naszym regionie. Byli reprezyntańci z Rybnika, Wodzisławia, Pszowa, Czerwionki, Rydułtow, Żor, Jastrzymbia-Zdroju, Świyrklan, Pszczyny i Ornontowic.

Umiom piyknie godać

Mioł żech tyn zaszczyt przewodniczyć jury tego konkursu, a towarziszyły mi dwie znane laureatki konkursu „Po naszymu, czyli po Ślonsku”, Lucyna Szłapka i Aleksandra Kotulska-Matuszczyk.

Dziecka wszystkie starały sie jak nojlepij swoji monologi wygłosić i wszystkie zasłużyły na nagrody, ale wybrać trza było yno trzech laureatow, a to niy było tak łaps, bo wszyskie wypadły bardzo dobrze. Umiom piyknie godać po naszymu i zdo mi sie, ze ta godka jednak przetrwo, jak dalij taki konkursy bydymy organizować.

I miejsce zajyna Alicja Wystub ze Szkoły Podstawowyj nr 19 w Rybniku, za godka o swojim starziku, kery niy umi dzisiejszyj techniki z komputerami pochytać, ale za to umi sie inaczyj bawić z wnukami i co chyci do rynki to poradzi zrobić i za to mu fest przaje. II miejsce zajyna Zuzanna Homel ze Szkoły Podstawowyj nr 1 w Pszowie. III miejsce zajon Artur Wystub z rybnickij Szkoły Podstawowyj nr 19. Jest to brat od Alicje, kero piyrsze miejsce wywalczyła.

Wyróżniynia dostali: Paweł Polok z Żor, Zuzanna Gruchot z Golejowa, Klaudia Bugla z Rydułtow, Marcin Galwas z Wodzisławia Śl., Mariusz Piech z Pszczyny i Zuzanna Błatoń z Rybnika.

Syndziom było fest ciynżko

Drugi dziyń konkursowy zaczon sie o godz. 9.00 16 maja i piyrsi zaczli ci nojmłodsi ze szkoł podstawowych od I do III klasy. A jak to było z miejscami, kere se te dzieci wywalczyły...? Było fest ciynżko nom syndziom wybrać tych nojlepszych, bo wszystkie dziecka bardzo sie starały jak najlepij te swoji monologi przedstawić. I miejsce wywalczyła Barbara Galwas z Wodzisławia. II miejsce zajyna Julia Pawliczek z Chwalyńcic, a III miejsce zajon Robert Psota z Jejkowic. A wyróżniyni dostała Emilia Pośpiech z Pszowa

Dran na gimnazjalistów

Na samym końcu prziszoł dran na gimnazjalistow i w tyj grupie nojlepsze okozały sie dziołchy, bo tyż ani jedyn synek w tyj grupie niy brol udziału. I miejsce zdobyła Aleksandra Gierszewska z Gimnazjum nr 2 z Raciborza. II miejsce dostała Maria Galwas z Gimnazjum nr 2 z Wodzisławia Śl., a III miejsce - Żaneta Konsek z Gimnazjum nr 2 z Raciborza. Wyróżniynie dostała Anna Siemianowska z Gimnazjum nr 2 z Żor.

Bergmon na klocku

Nagrodom za piyrsze miejsca we wszystkich grupach była rzeźba Ignaś, kero zrobiył artysta ceramik z Marklowic Zbigniew Mura, a kero przedstawio postać bergmona siedzoncego na klocku.

Bogdan Dzierżawa