Spotkani z prokuratorym

Dycko żech myśloł, że prokurator to taki człowiek kery nimo serca, ani tyż wyrozumiałości do inkszych ludzi, a co dopiyro do piykności naszyj natury i przirody. Chachnył żech sie pierońsko.

W Gorkach Ślonskich w sali świetlicy, kaj żech dostoł zaproszynie od mojigo kamrata Henryka Postawki,  30 marca odbyło sie spotkanie autorskie wielkigo miłośnika przirody, Aleksandra Żukowkiego, z zawodu prokuratora.

Musza symnyć czopka

Zaczło sie te spotkanie kole poł szostyj na wieczor i trwało chneda do dziewiontyj wieczor. Autor ksionżki „Sławne drzewa województwa śląskiego” przez przeszło trzi godziny łosprowioł o stromach i swojim zamiłowaniu do przirody. Godoł tak ciekawie, że mog bych go słuchać do rana. Co jo sie tam wszystkigo dowiedzioł, tego bych niy przipuszczoł i chocioż mom swoji lata i niyjedno widzioł, musza symnyć czopka przed młodym człowiekiym.  Niyjedyn z nas,  kery widzi przed sobom gruby strom, taki jak tyn dymb kole zomku w Rudach Wielkich, kery mo na miano „Cysters”, kombinuje wiela by z tego szło mebli, abo sztufow do schodow zrobić i wiela by jeszcze zostało drzewa do polynio w kuminku… a tymczasym dymb tyn w swojij młodości mog widzieć samego pogromce Turkow pod Wiedniym Jana III Sobieskiego.
 
Co nasz krol posadziył?

Z tym Sobieskim to tyż jest inkszo historyjo, jak idzie o te wszystki stromy, kere łon posadziył, bo kaj yno jaki chrubszy strom rośnie, to zaroz godajom, że go tyn krol posadziył. Jakby tak było, to myśla, że nimioł by borok kiedy tych Turkow młocić, bo by musioł sztyjc yno za łogrodnika robić. No ja – pan Żukowski przi sztyroletnim zbiyraniu  materiału do tyj ksionżki nasłuchoł sie o tym Sobieskim przi kożdym stromie, kery mierził, abo fotografowoł. O nikerych stromach to bych do dzisioj niy wiedzioł, keby niy zamiłowany w nich autor. Niy wiedzioł żech o „Marienajchu”, kery rośnie w Klyszczowce kole Żor, abo o buku w Świyrklanach, kerego zmierzić naokoło, brakłoby trzech dwametrowych myjtermasow.

Ksiynga woży chyba ze dwa kilo

Długo by szło jeszcze wymiyniać czego dokozoł Aleksander Żukowski, kery już w czasie nauki w gimnazjum poradziył przejechać na kole sztyry tysionce kilometrow po cołkim Ślonsku, żeby napisać praca konkursowo na tymat stromow polskich. Żeby zebrać cołki materiał do ksionżki „Sławne drzewa województwa ślaskiego”, zrobiył tysionc kilometrow na kole i dwanoście tysiyncy kilometrow autokiym. Na koniec powiym yno, że człowiek sie cołki życie uczy, dziynka takim zakrynconym ludziom. Jo zaś jest dużo mondrzejszy, a jeszcze bardzij byda, jak przeczytom cołko nabyto na spotkaniu w Gorkach Śląskich ksionżka z piyknom dedykacjom autora. A trza pedzieć, że to wielko ksiynga, woży chyba ze dwa kilo.

Bogdan Dzierżawa – Utopek z Wielopola