Darymny futer

Godajom, że Polsko to je kraj absurdow. I powiym wom yno tela, że nikiedy rychtyk tak je. Robi sie coś, a potym sie to buli, bo kieryś se coś źle policzoł. 

Jo se dycki myśloł, że to sie dzioło yno za komuny i we filmach od Bareje. Ale jednak je blank inakszy. My hanysy nazywamy to po imieniu– DARYMNY FUTER.

Świat to widzioł, żeby tak wielko rzecz jak Autobana, o kierej się trombi już mono ze 20 lot, tak wyonaczyć. Miała być fertig już na Euro 2012, pomału chyli sie na 2014, a my durch jeżdżymy bez obiazdy. Jako to je gańba przed Auslyndrami, kierzi tu przijyżdżajom. Śmiejom sie z nos w cołkij Europie. My kraj członkowski Unii Europejskij, a sie nie umiymy poradzić z drogom.

A już nojbardzi mie wnerwioło, jak ech łostatnio usłyszoł, że feralny most majom szprongnonć, bo śie ś nim rady niy umiom dać. No ja, yno kiery za to zapłaci? Myśla, że my podatnicy!

Myśla se tyż, że tyn kiery to projektowoł, na pewno je tera na dłogotrwałym krankolu i na pewno zepsuł sie mu tyż telefon i niy idzie sie do niego dodzwonić.

Powiym wom yno tela, że po mojimu, to je rychtyk darymny futer.

Dycki sie lachomy z pepikow, a łod kiedy już, majom autobana od Ostrawy fertig. Niy godom, bo człowiek ni ma tyż idealny, ale co zaś to zaś. Jak cza to cza. I u mie ni ma godki. Boł plan i autobana miała być fertig.

Jo yno wom powiym tela, że pod wiela w Polsce kożdy yno bydzie się czimoł stołka, żeby ś niego nie spaś, to rąk do roboty niy bydzie mioł.

A wom Kochani Ludkowie winszuja szczynśliwych, wakacyjnych rajzow bez stocio w korku. Pyrsk!

---

Krankol – chorobowe zwolnienie
Rajza – podróż
Buli – przewraca
Futer – pokarm