„Wiosynne porządki”

Godajom u nos na Slońsku, że chopa poznosz po placu, a baba po oknach. To znaczy chop mo dbać o porządek na placu, mieć zrobiony płot, a baba dycki musi mieć wzorowo czyste okna, no i piykne gardiny. To u Ślońzoczek je prawdziwy priorytet. A że momy już wiosna, toż cza sie chytać porządkow, choć latoś momy mały poślizg, bo zima odchodzi, chocioż odynś nie poradzi. Ale jo je dobrej myśli, że ta wiosna już u nos rychtyk bydzie.

Ptoszki rano śpiywajom, widno aż do wieczora, bez to człowiek by już wyloz na plac, posiedzioł na ławce i wygrzoł sie w słoneczku. A godajom, że wiosenne promyczki som nojzdrowsze i bezpieczne.

Ale wiosna, to nie yno siedzyni na ławce, ale przede wszystkim kupa roboty. Nojprzod cza pobiylić wszyski stromki w zegrodce. Potym cza przekopać zegrodka i posioć kaj jaki grincojg (szałoty, radistki, oberiba, marekwia, pietruszka, buraczki, cebula) i co yno kierymu sie spomni. Nikierzi jeszcze majom tomaty na oknach kiere w moju idom do foliokow abo glashauzow. A jak se tak człowiek wszysko posadzi, toż mocie pojynci jak sie potym dobrze ważi, kej wszysko je w zegrodce.

Wiosna to też je czas, że dobro gospodyni musi zadbać o kwiyci kole chałupy. Najlepsze som sierotki, smrodziuszki, no i muszkety. No i ważno sprawa-nowo gowiydź na placu. Nieśmi braknyć pilyntow, kaczek, no i kurzyntow, kiere na lato majom już niyś jajca. A swojski jajco na zista abo szpajza je niezastompione.

Jak widzicie, przed nami rychtyk moc roboty, ale przeca po zimie człowiek sie musi rozruszać. A ruch to zdrowi, bez to do roboty. Pyrsk!

---

Słowniczek:

Sierotki- bratki
Smrodziuszki- aksamitki
Radistki- rzodkiewka
Oberiba- kalarepa
Grincojg- zielenina
Stromek- drzewko
Muszket- pelargonia
Glashauz- szklarnia
Pila- mała gęś