Szkolorze do boju
Felieton Remigiusza Rączki.
I obejrzcie se jak tyn czas śmigo. Letni feryje już sie kończom, a to je znak, że trza sie szykować do szkoły.
Ci co pudom piyrszy roz muszom dostać tyta, no a reszta musi narychtować pukeltasze. Nowe hefty, blajsztifty, kredki i kaj yno co bądź.
Ale tak se myśla, że skompletować pukeltasza to je yno kosmetyka. A tak po prowdzie, to kożdy ształnuje, co to rychtyk bydzie z tymi szkołami na bezrok.
Od 20 lot sztyc momy jakiś reformy. Roz idom do szkoły 6–cio latki, roz 7–mio latki. Mieli my podstawowki 8 lot, teraz momy Gimnazja, a po 2017–tym wszysko uzaś bydzie przeciepnyte do gory nogami.
Jo sie yno pytom, po co? Żeby na siyła zrobić coś po swojimu i pokozać „dobro zmiana”?
Yno kto za to zapłaci?
Toż wom powiym kto – podatnik. Przeca chyba niy, Pan czy Pani poseł, kiero dźwigo rynka na głosowaniu, bo tak trza i „Prezes” se życzy.
Powiym wom, że żyjymy w państwie ludzi nierozważnych. A taki działani, jak reformy na siyła – to tak choby pokopać w mrowisku i „pitnyć”.
Przez 20 lot poszło kupa kasy na budowa Gimnzajow, szkolynia rechtorow, wyposażynia pracowni. A po 2017 niedoś, że tysiące ludzi straci robota, to trza bydzie udać chołda piyndzy na przerobki.
Powiym wom, że nie pojmuja tego. To tak choby kupić super nowy kombajn, a potym wszadzić go do stodoły i kupić nowo maszyna do młocynio, żeby yno było po starymu.
Nie rozumia tego myślynio, ale przede wszyskim tej niegospodarności. Jedno je pewne – fajnie sie dycki dzieli nieswojim. Pyrsk!
Heft – zeszyt
Blajsztift – ołówek
Rechtor – nauczyciel
Pukeltasza – tornister
Na bezrok – w przyszłym roku