Wakacyjny rajzyfiber

Kożdy z nos już jakoś na pewno mo zaplanowane wakacyje. Jedni łostanom w zegrodkach i bydom mieć wywczasy pod gruszom. Jedni pojadom nad morze, inksi do gór.

Tak czy siak wszyndzi sie cza spakować. A już nojbardzi jak jadymy zagranica. Bo i przeca cza grosz jaki wymiynić, choć najważniejszy je przeca paszport (no chyba, że jadymy do Czech). Przi tym pakowaniu to sie rychtyk idzie zakryncić. No chyba, że jadymy w ciepłe kraje, toż nom yno Batki som poczebne i jako kryma do opalanio.

Jak sie tak człowiek pakuje i rozważuje czy wszysko mo, to może go drapnyć rajzyfiber. Powiym wom czyste pieroństwo. Nikierzy majom skuli tego drapszajs, inksi gorączka choby byli rychtyk chorzi. A tak po prowdzie, to chyba, je to wszysko z nerwow abo wrażynio, że w końcu jadymy na wymarzone wakacje.

Jo nejgorszy rajzefiber mioł ech, jak piyrszy roz lecioł żech fligrym. Musza sie wom prziznać, że trocha mie morzyło na sama myśl, że byda 10 km w lufcie. Nie spominajonc już o tym jakby tak praje spod. Chocioż piyrszy mój lot boł rychtyk spokojny.

Drugi moj lot fligrym już niy boł taki wesoły. Wpadli my w turbulencje. Ciepało nami na prawo czy lewo. Powiym wom, że babka kiero kole mie siedziała, zeżykała różaniec z pryndkościom światła. Ale jakoś my toż przeżyli.

Powiym wom yno tela, że rajzyfiber to je fajne uczuci. Uciecha połonczono z takim małym strachym. To bezmałaś nazywo sie adrenalinom.

Dobrze jednak, że momy to yno roz w roku. Bo co za dużo to niy zdrowo.

Życza wom udanych wyjazdow i rajzyfibru ale bez gorączki. Pyrsk!

---

Fliger – samolot

Rajzefiber – gorączka przed wyjazdem

Drapszajs – biegunka

Rozważuje – myśli