Numer: 53 (373)
Data wydania: 31.12.13
Czas na zmiany
Felieton Remigiusza Rączki.
Ani my sie łobejrzeli,a już nom 2013 roczek mignoł. Mi sie zdo, że kożdy rok jakoś wartszy leci. Ludziom przibywo zmarszczek, czasy sie zmiyniajom, a nojbardzi poznać to po bajtlach, kiere rosnom w oczach. Ale tako to już je kolej rzeczy.
Koniec roku, to je taki czas na przemyślynia, podliczynia, ale i na noworoczne postanowiynia.
A jaki boł do wos tyn 2013 rok? Do jednych na pewno ciynżki, do inszych fest udany. Jedni halatali już na sama 13tka, insi na kryzys, a znojdzie sie i taki co nic mu nie pasowało.
We wszyskim jednak muszymy szukać pozytywow, choby tego, że som my zdrowi, momy robota i jakoś to wszysko sie kulo. Bo coż nom bez zdrowio? Żodne bogactwo nom tego nie nagrodzi.
Do mie tyn rok, boł rokiem ciynżkij roboty. Ale jak godo powiedzyni- „komu sie nie lyni, tymu sie zielyni”. Zresztom kożdo robota w końcu musi zaprocyntować. I jo tyż na to licza. Zresztom godajom, że co nos nie zabije to nos wzmocni.
O mojich postanowiyniach nie byda godoł, ale powiym czego bych se życzoł- spokoju, życzliwych dokoła ludzi, chocioż troszka czasu do sia, no i zdrowio, kiere je nojważniejsze.
Wom tyż życza tego samego, udanych fajerow sylwestrowych, no i szczynśliwego Nowego Anno Domini 2014. I pamiyntejcie, że Nowy Rok je dobrym czasym na zmiany. Zdrówka, pyrsk!
wartszy – szyciej
bajtel – dziecko
fest – bardzo
halatać – narzekać
do sia – do siebie