Andrzejki czy ślydź?

Jeszcze pora lot tymu były 3 fajery na kierych cza było być. Andrzejki, sylwester, no i na zakończyni zapustow (terozki sie godo karnawał) Ślydź. Ludziska dali fajrujom, ale mi sie zdo, że o Śledziu my jakoś zapomnieli.

Toż czamu Andrzejki jednak som lepsze?

Jo myśla, że je tak skuli tego, że jednak kożdy woli Godni Świynta i już pomału zaczyno czekać na nich. A Andrzejki som takom wilijom Adwentu, po kierym som już yno ukochane świynta. Po drugi w okolicach Andrzejek płacom już dycki barborki, toż wiycie, z tego dobrobytu i gelynder je nikiedy leberkom pomazany. A po czeci, to je to staro słowiańsko tradycjo. Przeca dziołchy od wieki wiekow, wrożyły se w tym dniu, czy sie na bezrok wydajom, skond przidzie galan i jaki tyż bydzie. Szwarny, bogaty czy też biydny i szczyrbaty

A po czworte, choć na Slońsku imiynin nie fajrujymy, we Andrzejki zawsze trefi sie jakiś Andrzej, kiery chce abo i niy, halba musi postawić.

Tak se myśla, że to skuli tego wszyskigo Ślydź przegrywo z Andrzejkami.

A jo już tak na koniec życza wom udanych fajerowi i robcie tak, żeby wos gowa rano nie bolała. Pyrsk!

---

Godni Świynta – Boże Narodzenie

Wilijo – wigilia

Gelynder – poręcz

Leberka  – pasztetowa

na bezrok – w przyszłym roku

Halba – pół litra wódki

Galan – narzeczony