Świynto Młodego Wina

Nie wiym czy Wy Roztomili Ludkowie wiycie, że w tyn czwortek bydzie na cołkim świecie Świynto młodego wina, kiere sie nazywo Beaujolais Noveau. Świynto te fajruje sie w kożdy czeci czwortek listopada. Wtedy tyż idzie pokosztować piyrszy roz latosigo wina.

A szmak wina, dużo zależy od tego jaki było lato, czy ciepłe i ze słońcym, czy taki ukidane łod deszczu. Latoś były hyce jak pieron, bezto wino nie śmiało by być kwaśne.

A musza wom pedzieć, że we Francji wino to je świyntość. Jak ech tam boł, toch sie rychtyk o tym przekonoł. Pije sie go do obiadu, wieczerze. Ważi ś niego zupy, a na polach zamias zimiokow i obiylo, wszyndzi yno wino. A winnice czym starsze, tym lepsze ś nich je wino. Mocie pojynci, że taki krzoczek winny może mieć i 120 lot. To je drek unmygliś.

A my na Slońsku, czy momy tradycje winne? Jasne, że ja. Przeca dycki sie kisiyło wino z jabek, śliwek, ostrynżlic, czy malin. Yno u nikerych mało kiedy dotwało do listopada. Przeca, cza było pokosztować, czy nie brakuje cukru i czy choć aby nie obraco sie w ocet. Jedni godali, że jakby tak miało złoccieć, to lepszy wartko go wypić. Toż szlauchy szły w ruch, a wino flaszkowanio nie doczekało. Yno w gyrglasie przestało bulkać już sie degustowali.

Zawsze jednak mogymy pedzieć, że tyż to som tradycje winiarskie. Yno troszka inksze.

A jo już tak na koniec, winszuja Wom udanego fajrowanio świynta i pamiyntejcie o swojich wątrobach. Pyrsk!

---

Unmygliś – niemożliwe

Latosi – tegoroczne

Ostrynżlice – jeżyny

Gyrglas – szklana rurka z gąsiora

Bulka – gazować