Wielkanocne poruszyni

No i momy kwiytni tydziyń, bo w niedziela była niedziela palmowo. Mom nadzieja, że po krziżu palmom żeście som poklupani, żeby wos wcale, a wcale nie szczikało w nim. No a palma czeko terozki na krziżyki, kiere sie ś ni robi i w każdym rogu na polu styrko do ziymie, żeby wszysko obrodziło jak trza. 

Do szczrody momy dobry czas na sadzyni kwiycio, ale kapusty nie siyjcie, bo bydom same wyrostki. No i pomału cza już wyndzić szinki, woszty kiere przeca majom być na wielkanocnym talyrzu.

Od sztwortku nie grzebcie już we ziymi, ani nie romplujcie na dworze, żeby pomału wyciszać sie i czakać na Pon Boczka kiery mo zwartychwstać we niedziela. W piontek rano trza obmyć nogi we sztrece  na pamiątka mycio nog apostołom. W piontek tyż czekajom nos wielkie wypieki, kiere pierońsko dobrze woniajom, cożkej nie idzie ani troszka szkubnyć. Bo przeca jak sie piekom zisty, chleby, świyncelniki toż wonio nie możliwie, a we piontek post.

I yno co najwyżsi harynki idzie jeść.

We sobota zafarbcie se jajca we cebuli, żeby do koszyczka było co wrazić i poświyncić. Bo bez jajca, soli i chleba ni ma Wielkanocy. Nie zapomnijcie tyż nawarzyć żuru ze chrzanym, kiery mo dać nom krzepa bez cołki rok.

A we śmiergust koniecznie musicie zaliczyć smażonka ze sznytlochym i wyndzonkom, bez kierych nie wyobrażom se świont.

Roztomili Ludkowie, życza wom dużo zdrowio, radości i żebyście se wszyjscy pszoli w tyn świąteczny czas.

Pyrsk!

Styrkać - wkładać

Romplować - tłuc, hałasować

Woniać - pachnieć