Rechtory, rechtoreczki

Ani sie człowiek nie obejrzoł, a dyć już momy połowica października. A dycki 14-tego momy „Dziyń nauczyciela”, to tak po polsku, a po naszymu „Dziyń Rechtora”.

Kupa sie teraz robi larma i ostudy kole tych rechtorow. Jedni zowiszczom dłogich feryji, inksi niby lekkij roboty, a jo yno przitocza taki porzekadło: „kebyś yno cudzych bajtli niy musioł uczyć”.

Piyrwej to rechtorki miały wiele poważani, bo przeca kształciyły prziszłe pokolynia,  dzisio jakoś je blank inakszy. Ludziska godajom na zawod rechtorki robota. A jo Wom godom, że to je cosik wiyncyj, tu cza mieć, tak jak faroż powołani. A te powołani to kupa ciyrpliwości, spokoj i cza jeszcze poradzić nauczyć, a nie roz trefi sie tłok niemożliwy i co tu robić? Żodyn rechtor przeca hercowom do łepy wiedzy nie naciśnie.

Ale gorszo rzecz dzisio, to po mojimu je to, że ni ma posłuchanio dlo rechtorów ani szacunku. Bajtle i młodzioki som co rusz to bardzi frechowne, bo przeca wszysko sie im noleży.

Jo godom, że to już je nowe pokolyni – pokolyni techniki. I coż z tego, że poradzom na wszystkim pinkać (komputer, mp3, mp4, komórka, palmptopt), a wygodać się nie umiom.

Terozki prziszła moda na pisani i klikani, a ku tymi jeszcze w skrotach – (nara, cze).

A jo się pytom, kaj przi tymu je człowiek? Techniki już nie zasztrabujymy, ale chocioż bajtli cza uczyć kultury.

Weźcie łod czasu do czasu podziynkujcie rechtorom za ta cołko nauka kiero wom przekozujom i to bydzie dlo nich nojlepszo zapłata, a kiery niy powinszował skiż Dnia Rechtora, niech to zrobi, bo lepszy nieskoro niż wcale. Pyrsk!

---

Słowniczek dlo bajtli:

Rechtor – nauczyciel
Zowiścić – zazdrościć
Sztrabować – zatrzymywać, ograniczać
Frechowny – bezczelny
Faroż – ksiądz (proboszcz)
Hercowa – łopata do nakładania
Pinkać – klikać, grać na różnych urządzeniach