Numer: 26 (815)
Data wydania: 28.06.16
Pioter, Paweł grziby siejom
Felieton Remigiusza Rączki.
Pioter, Paweł grziby siejom. Tak mi dycki godoł moj świyntej pamiynci starzik. A 29 czyrwnia właśnie bydzie Piotra i Pawła, czyli tych nojważniejszych Apostołow.
Bezmałaś właśnie od tego czasu idzie w lasach znojść roztomańte grziby- prowoki, maśloki, kozoki. A do tego jak latoś przepaduje i je duszno, toż na pewno grzibow nie braknie.
No i jeszcze jedna rzecz- borowki. Jak już bydziecie w lesie, toż grzychym by było nie nazbiyrać borowek. Przeca to je samo zdrowi- a już na pewno zdrowe oczy, dziynki luteinie kierej w nich nie brakuje. Yno pamiyntejcie, jak pudziecie do lasu, to koniecznie sie naszmarujcie krymom łod klyszczy. Bo tam ich nie brakuje.
29 tego czyrwnia to tyż najwyższy czas, żeby natargać orzechow włoskich na nalywka. To właśnie teraz je nojlepszy czas, bo orzechy som jeszcze w pojśrodku biołe. Beztoż trza jich yno przewalić bez poł i zaloć szpirolym. A za 2 miesionce bydzie goszczelina na żołądek jak znojd.
Poczontek lata, to piykny czas. Dłogi dnie, krotki noce, ale tyż kupa roboty. Bo i świyntojanki już som żdżałe, beztoż miejsce w krauzach na nich czeko.
Jednym słowym idzcie do lasa, nazbiyrejcie se darow przyrody, a na pewno bydziecie radzi.
No i czekomy na dary Piotra i Pawła.
Świyntojanki – porzeczka czerwona
Żdżałe – dojrzałe