Wysyp bań

Powiym wom, że latosio pogoda siadła baniom jak pieron. Piyrsze padało, terozki piyknie i słonecznie. Raj do bań. Na polach aż żołto i pomarańczowo.

A bania samo zdrowi, troszka zapomniano, ale wraco do łask. I chwała Bogu.

Ale tak po prowdzie, troszka pomogła nom w tym ta moda, kiero prziszła drek aż z Ameryki na banie. Jedni wyciepujom tyn środek i styrkajom tam świyczka, keby im to piyknie wyglondało, inksi dowajom przed dźwiyrze z chałupy, a jo wola bania zjeś. Bo je pierońsko zdrowo, ale o tym zaro byda kludzić dali. Bogactwo potasu, żelaza i fosforu, czyli pierwiastkow, kierych trza sercu.

Kochani Ludkowie jak se tak nikiedy siedza, to se myśla, że te nasze omy były pierońsko mondre, a przeca sztudyjow ni miały pokończonych. Wiedziały co je dobre i zdrowe i poradziły to jeszcze przirychtować. Tak też było z baniom. Dobry kompot z banie, zupa czy placki– tego szło pokosztować u naszym om.

Ale nie wiym, czy wiycie, że bania mo tyż mało kaloryji (to je informacjo do szlangierow, kiere wszyskigo bojom sie jeś, żeby yno nie srubnyć), je zdrowo, a nojbardzi, to te pecki. Pecki cza yno posuszyć i idzie ich chrupać – chopy radza wom, bo je to przeciw prostacie, skiż tego, że je tam dużo cynku. No a kompot z banie możecie se dać abo do krałzy, abo uważić na świyżo. Yno, żeby to szmakowało, cza tam dać grzebyczkow, skurzice, wanilie, octu, cukru i wtedy mucha niy siodo, co to tak szmakuje. Kompot musi woniać prziprawami i być lekko pokwaskowaty. Wożcie bania, a bydziecie zdrowi jak łania.

---

Szlangiera – szczupła osoba

Pecki – pestki

Grzebyczki – goździki

Skurzica – cynamon

---

Audycja „Rączka gotuje” również w Radiu Vanessa FM od poniedziałku do soboty o 11.45 i 16.45